ការជ្រើសរើសគូអនាគតជារឿងសំខាន់បំផុតក្នុងឆាកជីវិតមិនថាប្រុសឬស្ត្រីនោះទេ។ តែដោយឡែកនៅក្នុងសង្គមខ្មែរច្រើនតែស្ត្រីជាជនរងគ្រោះ។ ជាទូទៅកត្តាដែលនាំឲ្យជ្រើសរើសគូអនាគតខុស ដោយសារតែមិនបានពិចារណាឲ្យបានម៉ត់ចត់ យកស្នេហ៍ផ្លេកបន្ទោរ មកធ្វើជាហេតុផលថាមិនអាចអត់បាន។ ខាងក្រោមនេះជាកត្តាមួយចំនួនដែលស្ត្រីគ្រប់រូបគួរពិចារណាមុនពេលជ្រើសគូស្រករ៖
១. បើមានគំនិតចង់បន្តការងារក្រោយពេលរៀបការ មិនត្រូវជ្រើសរើសបុរសណាដែលមិនចូលចិត្តការងាររបស់អ្នកនោះទេ ព្រោះគេនឹងមួម៉ៅនៅពេលឃើញអ្នកចំណាយពេលច្រើនទៅលើការងារ ដូច្នេះជម្លោះអាចនឹងកើតឡើងគ្រប់ពេល។
២. ត្រូវចេះជ្រើសរើសយកអ្នកណាដែលអ្នកនៅក្បែរហើយ មានអារម្មណ៍ថាសប្បាយចិត្ត។ ការចេះចែករំលែករឿងល្អឲ្យគ្នា នឹងធ្វើឲ្យកាន់តែរីករាយឡើង ហើយពេលជួបបញ្ហាស្មុគស្មាញអាចកាត់បន្ថយអារម្មណ៍តានតឹងបាន។
៣. ចំណុចដែលមិនត្រូវភ្លេចនោះគឺ មើលថា តើគេជាមនុស្សមានចរិតឆេវឆាវ ចិត្តដូចភ្លើងសាំងដែរឬទេ? ហើយតើគេស្ថិតនៅក្នុងជំពូកកូនសំណព្វចិត្តដែរឬអត់? គុណវិបត្តិទាំង២នេះ អាចនាំមកនូវគ្រោះថ្នាក់បន្ទាប់ពីរៀបការហើយ ។
៤. សូមកុំយកប្ដីដោយសារតែខ្លាចភាពឯកោ។ ត្រូវចាំទុកថា គ្មាននរណាឯកោជាស្ត្រីដែលត្រូវប្ដី ធ្វើព្រងើយមិនយកចិត្តទុកដាក់នោះទេ។
៥. ទោះបីជាបុរសនោះមានលក្ខណៈពិសេសអស្ចារ្យយ៉ាងណាក៏ដោយ អ្នកមិនត្រូវយកបុរសដែលធ្លាប់ប្រើអំពើហិង្សា ឬធ្លាប់ធ្វើបាបបំបាក់មុខអ្នកឡើយ។ ត្រូវចាំថា បុរសប្រភេទនេះ គ្រោះថ្នាក់ណាស់ ចំពោះសុខភាពផ្នែកស្មារតី និងរាងកាយ។
៦. ត្រូវប្រយ័ត្នចំពោះបុរសដែលតែងតែផ្គាប់ចិត្តអ្នកដោយប្រើអំណោយ ។ តើការប្រុងប្រយ័ត្ននេះខុសឆ្គងឬទេ? មិនខុសទេ! ព្រោះមូលដ្ឋាននៃសេចក្ដីស្នេហាមិនឋិតនៅលើប្រាក់នោះទេ។ បើអ្នកឈានទៅរកស្នេហាតាមផ្លូវវត្ថុអំណោយជាកត្តាសំខាន់នោះ ថ្ងៃណាមួយអ្នកពិតជាដូចទំនិញរបស់គេជាមិនខាន។
