ការធ្វើឲ្យនារីម្នាក់ចាប់អារម្មណ៍គឺជារបៀបដែលអាច ឈានទៅរកទំនាក់ទំនងដ៏រឹងមាំមួយ។ ចំណាប់អារម្មណ៍គ្រាដំបូងគឺពិបាកនឹងបំភ្លេចបំផុត ពោលគឺអាចឲ្យគេចងចាំអ្នកបំផុត។ បុរសភាគច្រើនតែងតែធ្វេសប្រហែស ក្នុងការសម្ដែងទាមទារចំណាប់អារម្មណ៍ពីនារីៗ។
១.បង្ហាញការស្មោះត្រង់ និយាយត្រង់ៗៈ គ្មាននារីណាម្នាក់ចង់ឲ្យគេនិយាយកុហកមកកាន់ខ្លួនទេ ហើយគេពិបាកទទួលយកបំផុតពេលដឹងថាអ្នកមិនស្មោះត្រង់ជាមួយគេ។ ជួនកាលអ្នកអាចធ្វើខុសដោយអចេតនា ដូចនេះអ្នកគួរកុំលាក់បាំងនាង កុំបណ្ដោយឲ្យនាងបាត់បង់ទំនុកចិត្តលើអ្នកឲ្យសោះ។ អ្នកនឹងបាត់បង់នាង ខណៈដែលនាងបាត់បង់ភាពជឿជាក់លើអ្នក។ ដូចនេះជំហានដំបូង អាចបង្ហាញឲ្យអស់ថាអ្នកជានរណា ឲ្យពិតប្រាកដ ។
២.គោរពនាងៈ គ្រប់ស្រ្តីទាំងអស់តែងតែសង្ឃឹមថាបុរសម្នាក់នោះចេះគោរពឲ្យតម្លៃនាង ហើយកុំបំផ្លាញភាពឯករាជ្យរបស់នាង គោរពការសម្រេចចិត្តរបស់នាង។ ដូចនេះចូរអ្នកសម្ដែងឲ្យនាងបានឃើញ និងយកចិត្តទុកដាក់ថានាងចូលចិត្តអ្វី។ លើសពីនេះចូរអ្នកដឹងថា ការដែលអ្នកចេះស្ដាប់នូវគំនិត យល់ពីអារម្មណ៍របស់នាង គឺជារបៀបដែលបង្ហាញឲ្យឃើញថាអ្នកពិតជាគោរពនាង។ តែកុំភ្លេចថាបង្ហាញនាងនូវការគោរពដ៏ពិតប្រាកដ។
៣. ឆ្លើយឆ្លងគំនិតជាមួយនាងៈ អ្នកដឹងទេថានារីៗ ស្អប់ណាស់បុរសណាដែលបិទការបញ្ចេញគំនិតរបស់នាង និងមិនយល់ពីអារម្មណ៍នាង ដែលជាទូទៅនារីតែងតែបញ្ចេញ អារម្មណ៍ សេចក្ដីរំភើបទៅកាន់មនុស្សដែលនាងពេញចិត្ត និងចង់បានការយកចិត្តទុកដាក់ពីអ្នកជុំវិញ។ ដូចនេះអ្នកគួរចេះចូលរួមជាមួយនាង ចែករំលែកពីអារម្មណ៍ផ្ទាល់ខ្លួនរបស់អ្នក ដោយគិតថាបើអ្នកកាន់តែបើកចំហពីអារម្មណ៍ផ្ទាល់ខ្លួន កាន់តែធ្វើឲ្យអ្នកអាចទាញយកការចាប់អារម្មណ៍ជាពិសេសពីនាង។
៤.ដាក់ខ្លួននិងជឿជាក់ខ្លួនឯងៈ បុរសដែលមានទំនុកចិត្ត ក៏អាចធ្វើនារីទុកចិត្តនិងមានអារម្មណ៍កក់ក្ដៅ មានសុវត្ថិភាព។ នារីក៏មិនចង់បានបុរសដែលទន់ជ្រាយ នារីមិនយករូបសម្បត្តិជារឿងដំបូង ដូចអ្វីដែលបុរសគិតទេ ដូចនេះ គួរអត់ធ្មត់ ដាក់ចិត្តដាក់កាយ សម្ដែងសកម្មភាពទាំងឡាយឲ្យនាងគិតថាអ្នកអាចជាទីពឹងពាក់សម្រាប់នាង។
៥.សម្ដែងពីគោលដៅច្បាស់លាស់និងភាពជាអ្នកដឹកនាំរបស់អ្នកអោយនាងឃើញៈ ធ្វើជាមនុស្សដែល អាចឈរយ៉ាងរឹងមាំនិងអាចដើរបាន មិនមែនជាមនុស្សដែលស្ថិតក្រោមការដឹកនាំពីអ្នកដទៃជានិច្ចឡើយ។ នារីក៏ចាប់អារម្មណ៍បំផុតបុរសដែលលអាចគ្រប់គ្រងជីវិតដោយខ្លួនឯង ជាពិសេសសម្ដែងភាពដោយឡែករបស់អ្នកឲ្យនាងឃើញ ដោយចាំថាបើអ្នកក្លាយជាមនុស្សសាមញ្ញ ធម្មតាពេក នោះអ្នកនឹងត្រូវនាងបំភ្លេចដោយងាយដែរ។
៦.កុំខ្មាសអៀននូវអ្វីដែលខ្លួនអ្នកមាន ទទួលស្គាល់ថាអ្នកជានរណាៈ ការលាក់បាំង ការគេចវេះពីការពិត មិនបានជួយឲ្យនាងអាណិតអ្នកទេ អ្នកមិនចាំបាច់គិតថាអ្នកត្រូវ តែល្អឥតខ្ចោះនៅពេលដែលអ្នកនៅជាមួយនាងឡើង នាងត្រូវការតែអ្វីជាធម្មជាតិរបស់ ដែលអ្នកមានប៉ុណ្ណោះ។
៧. ចេះធ្វើអោយនាងសើចៈ ជាទេពកោសល្យទាក់ទាញចំណាប់អារម្មណ៍នារីជាពិសេស ។ មិនថាពេលដែលនាងមិនសូវសប្បាយចិត្ត ឬមិនទាន់ស្គាល់អ្នកច្បាស់ បើអ្នកមានវិធីសាស្ត្រណាដែលអាចឲ្យនាងញញឹម អាចឲ្យគេភ្លេចរឿងដែលមិនសប្បាយចិត្ត នោះអ្នកនឹងក្លាយជាមនុស្សសំខាន់សម្រាប់នាងមិនខាន។ តែទោះជាយ៉ាងណាគួរចេះគ្រប់គ្រងទេពកោសល្យមួយនេះឲ្យបានល្អ ព្រោះកាលណាអ្នកសម្ដែងជ្រុលជ្រួស អាចឲ្យនាងគិតថាអ្នកជាមនុស្សលេងសើច មិនបានការ ឬគិតថាអ្នកកំពុងសើចចំអកឲ្យនាងជាដើម៕
No comments:
Post a Comment